ప్రతి ఒక్కరినీ వేధించే సమస్య.. చుండ్రు. దీన్ని వదలగొట్టుకొనేందుకు వాడని షాంపూ లేదు.. చేయని ప్రయత్నమంటూ ఏదీ ఉండదు. ఈ చుండ్రు వల్ల కళ్ల దురదలు కూడ వేధిస్తాయి. చండ్రు ఎక్కువైతే.. క్రమేనా చర్మ సమస్యలు కూడా వస్తాయి. తలపై చుండ్రు ఎక్కువైతే స్థైర్యం దెబ్బతింటుంది. చికాకు పెరుగుతుంది. బయటకు వెళ్లాలంటేనే భయం కలుగుతుంది. నలుగురితో కలిసి తిరగలేని పరిస్థితి ఏర్పడుతుంది. చుండ్రు కొందరిలో ఏకాగ్రత దెబ్బతీస్తుంది. అయితే, ఈ సమస్య నుంచి బయటపడేందుకు ఖరీదైన మందులు, రసాయనాలు కొనాల్సిన అవసరం లేదు. ఈ కింది చిట్కాలు పాటిస్తే చాలు.
ఏం చేయాలి?:
చిట్కా 1: రాత్రి మెంతుల్ని నీటిలో నానబెట్టి.. ఉదయాన్నే రుబ్బండి. అనంతరం ఆ మిశ్రమాన్ని తలకు పట్టించండి. ఓ గంటసేపు ఆగి షాంపూతో తలంటుకోండి. ఇలా చేయడం వల్ల చుండ్రు తగ్గడమే కాకుండా మాడు కూడా చల్లబడుతుంది.
చిట్కా 2: వేప నూనె, ఆలివ్ ఆయిల్ను సమాన మోతాదులో కలిపి వేడి చేయండి. గోరు వెచ్చగా ఉన్నప్పుడే ఆ మిశ్రమాన్ని వెంటుకలకు, మాడుకు రాసుకోండి. పావుగంట తర్వాత షాంపూతో శుభ్రం చేసుకోండి.
చిట్కా 3: చిన్న అల్లం ముక్కను సన్నని ముక్కలుగా తరిగి నువ్వల నూనెలో వేయండి. ఆ నూనెతో తలకు మర్దనా చేసుకోవాలి. రాత్రి నిద్రపోయే ముందు తలకు రాసుకొని ఉదయానే షాంపూతో శుభ్రం చేసుకోండి. ఇలా వారానికి మూడు సార్లు చేస్తే చుండ్రు తగ్గుముఖం పడుతుంది.
చిట్కా 4: కలబంద గుజ్జును మాడుకు పట్టించి పావుగంట తర్వాత షాంపూతో శుభ్రం చేసుకోండి. వారానికి మూడు సార్లు ఇలా చేయడం వల్ల చుండ్రు సమస్య తగ్గడమే కాకుండా వెంటుకలు మృదువుగా మారతాయి.
