Raju's Resource Hub
పేలనుండి ఉపశమనం పొందటానికి మార్కెట్లో చాలా షాంఫూలు లభిస్తున్నాయి. కాని అవి రసాయనాలతో తయారు చేయబడినవి. అలా కాకుండా సహజసిద్ధంగా దొరికే పదార్థాలతో పేల బాధ తగ్గించుకోవడానికి కొన్ని చిట్కాలు :
పేల నివారణకు వెల్లుల్లి అద్భుతంగా పని చేస్తుంది. ముందుగా కొన్ని వెల్లుల్లి రెబ్బలను మెత్తగా నూరి, దానికి కాస్త నిమ్మరసం కలపాలి. ఈ మిశ్రమాన్ని మాడుకు పట్టించి మునివేళ్లతో చిన్నగా మర్ధన చేయాలి. గంటసేపు అలాగే ఉంచాలి. ఆ తరువాత గోరువెచ్చని నీటితో తలస్నానం చేయించి.. చిక్కుదువ్వెనతో దువ్వాలి. అప్పుడు పేలు మొత్తం రాలిపోతాయి.
రెండు టేబుల్ స్పూన్ల వెనిగర్ కు అంతే మోతాదులో నీరు కలిపి ఆ మిశ్రమాన్ని తలకు రాసి ఆరనివ్వండి. సరిగ్గా గంట తరువాత కుంకుడు కాయరసంతో తలస్నానం చేయాలి.
ఒక కప్పు కొబ్బరినూనెలో టీస్పూన్ కర్పూరం పొడి కలపాలి. ఆ పొడి కరిగిపోయేదాకా కొబ్బరినూనెను వెచ్చబెట్టండి. గోరువెచ్చగా నూనెను మాడుకు అంటేలా శుభ్రంగా మర్థనా చేయాలి. ఒక గంటతరువాత కుంకుడు కాయల రసంతో స్నానం చేయాలి.
బాదం పప్పులను ఒకరోజు మొత్తం నీటిలో నానబెట్టాలి. ఉదయాన్నే వాటిపైనున్న తొక్కను తీసేసి.. మెత్తటి పేస్టులా రుబ్బుకోవాలి. అందులోకి రెండుమూడు స్పూన్ల నిమ్మరసం కలిపి. జుట్టు కుదుళ్లకు పట్టించాలి.
గుప్పెడు తులసి ఆకులు తీసుకొని నూరి రాత్రి నిద్రపోయేముందు తలకు అంటేలా రాసుకోండి. తర్వాత వెంట్రుకలు కనిపించకుండా తలకు మెత్తని వస్ర్తం కట్టుకొని పడుకోండి. తెల్లారి లేచిన తరువాత పేల దువ్వెనతో దువ్వండి.
వేపగింజల నూనె మార్కెట్లో దొరుకుతుంది. దాన్ని తీసుకుని తలకు పట్టించవచ్చు. లేదంటే వేపనూనెకు షాంపూను కలిపి కూడా జుట్టుకు అప్లై చేయవచ్చు.
రాత్రి పడుకోబోయే ముందు ఆలివ్ నూనెను తలకు బాగా పట్టించి తర్వాత ఒక ప్లాస్టిక్ సంచిని తలకు చుట్టుకొని పడుకోండి. తెల్లారిన తరువాత పేల దువ్వెనతో శుభ్రంగా దువ్వండి వారానికి ఒకసారి ఇలా చేస్తే పేలబాధనుండి విముక్తి పొందవచ్చు.
