వంకాయతో వంటలు

Brinjal Fry…వంకాయ ఫ్రై

కావలసినవి
లేత వంకాయలు : పావుకిలో
ఉల్లిపాయ : ఒకటి
పచ్చి మిరపకాయలు : మూడు
నూనె : రెండు టేబుల్ స్పూన్లు
కరివేపాకు : రెండు రెమ్మలు
పచ్చి కొబ్బరి తురుము: 2 స్పూన్లు
పసుపు : పావుస్పూన్
ఉప్పు : తగినంత
తిరగమాత గింజలు : 1 టేబుల్ స్పూన్
ఎండుమిర్చి : 2 కాయలు
అల్లం, వెల్లుల్లి పేస్ట్ : 1 టేబుల్ స్పూన్

తయారుచేసే విధానం
ముందుగా వంకాయలను ఉప్పువేసిన నీటిలో శుభ్రంగా కడుగు కోవాలి. వంకాయలను కోసిన వెంటనే కొద్దిగా ఉప్పు వేసిన నీటిలో వేయాలి లేకపోతే ఇవి కండ్రు ఎక్కి చేదుగా మారుతాయి. వంకాయలను మధ్యలోకి కోసి వాటిని తిరిగి నిలువుగా నాలుగు ముక్కలుగా కోసుకోవాలి. ఉల్లిపాయలను, పచ్చిమిర్చిని కూడా చిన్నవిగా తరుగుకోవాలి. తరువాత స్టవ్ వెలిగించి వెడల్పాటి పాన్ పెట్టి అందులో నూనె వేసి వేడెక్కిన తరువాత ఎండుమిర్చిని రెండుగా తుంచి వేయాలి. అవి కొంచెం వేగాక తిరగమాత గింజలు వేసి అవి కూడా వేగాక సన్నగా కోసిన ఉల్లిపాయ ముక్కలు, మిర్చి, రెబ్బలు కూడా వేసి గోల్డెన్ కలర్ వచ్చే దాకా వేయించాలి. తరువాత అందులో వంకాయ ముక్కలు వేసి, కొద్దిగా పసుపు, అల్లం వెల్లుల్లి పేస్ట్ కూడా వేసి సన్నని సెగమీద చక్కగా వేగనివ్వాలి. తరువాత కొబ్బరి తురుము, ఉఫ్పు వేసి చక్కగా కలిపి ఇంకొద్ది సేపు వేగనిచ్చి దింపుకోవాలి.

బ్రింజాల్‌ రోల్స్‌

కావలసినవి: వంకాయలు (బ్రింజాల్‌) – 3 లేదా 4 (పొడవైనవి), ఆలివ్‌ నూనె – 2 టేబుల్‌ స్పూన్లు, మిరియాల పొడి – అర టీ స్పూన్‌, నీళ్లు – 2 టేబుల్‌ స్పూన్లు, నిమ్మరసం – 4 టేబుల్‌ స్పూన్లు, ఉడికించిన బియ్యం రవ్వ – ముప్పావు కప్పు, అవకాడో – 1, నూనె – డీప్‌ ప్రైకి సరిపడా, టమాటా ముక్కలు – పావు కప్పు, జీలకర్ర పొడి – అర టీ స్పూన్‌, ఉల్లిపాయ ముక్కలు – పావు కప్పు, ఉల్లికాడ ముక్కలు – 2 టేబుల్‌ స్పూన్లు, బీట్‌ రూట్‌ తురుము – 3 టేబుల్‌ స్పూన్లు, కొత్తిమీర తరుగు – 2 టీ స్పూన్లు, పుదీనా తరుగు – 1 టేబుల్‌ స్పూన్లు, క్యారెట్‌ – 3, వేరుశనగలు – పావు కప్పు (రవ్వలా మిక్సీ పట్టుకోవాలి), ఉప్పు – తగినంత.

తయారీ: ముందుగా వంకాయలను శుభ్రం చేసుకుని, కాడలు తొలగించి పదిహేను నిమిషాల పాటు ఉడికించుకోవాలి. ఇప్పుడు ఒక బౌల్‌ తీసుకుని అందులో ఆలీవ్‌ నూనె, ఉప్పు, మిరియాల పొడి, రెండు టేబుల్‌ స్పూన్ల నిమ్మరసం, నీళ్లు వేసుకుని బాగా కలుపుకుని పక్కన పెట్టుకోవాలి. అనంతరం ఓ పాన్‌లో 2 టేబుల్‌ స్పూన్ల నూనె వేసుకుని వేడి కాగానే వేరుశనగ రవ్వ, బీట్‌రూట్‌ తురుము, టమాటా ముక్కలు, ఉల్లిపాయ ముక్కలు, ఉల్లికాడ ముక్కలు, పుదీనా తరుగు, కొత్తిమీర తరుగు, జీలకర్ర పొడి ఒకదాని తర్వాత ఒకటి వేసుకుంటూ గరిటెతో తిప్పుతూ దోరగా వేయించుకోవాలి.

ఇప్పుడు అందులో ఉడికించిన బియ్యం రవ్వను కూడా వేసుకుని గరిటెతో తిప్పుతూ ఉండాలి. అందులో ఆలివ్‌ మిశ్రమం కూడా వేసుకుని, చివరిగా సరిపడా ఉప్పు వేసుకుని, బాగా కలుపుకుని స్టవ్‌ ఆఫ్‌ చేసుకోవాలి. తర్వాత మెత్తగా ఉడికిన వంకాయలను పొడవుగా (థిన్‌ స్లైస్‌లా) కట్‌ చేసుకుని, నూనెలో దోరగా వేయించుకుని, అందులో కొద్దికొద్దిగా ఈ మిశ్రమాన్ని ఉంచుతూ రోల్స్‌లా చుట్టుకుని కొత్తిమీర లేదా పుదీనాతో గార్నిష్‌ చేసుకుని, టమాటా సాస్‌తో సర్వ్‌ చేసుకుంటే భలే రుచిగా ఉంటాయి.

వంకాయ పచ్చి పులుసు

ముందుగా,జామకాయ అంత నల్ల చింతపండు నానబెట్టాలి. ఇప్పుడు నల్లగా పెద్దగా ఉన్న ఒక వంకాయని తీసుకుని కడిగి తుడిచి నూనె రాసి నిప్పుల మీద కాల్చాలి. బొగ్గుల కుంపటి మీద కానీ, గాస్ పొయ్యి మీద కానీ…అటూ ఇటూ తిప్పుతూ కాలుస్తూ ఉండాలి..పది నిమిషాలకి అన్ని వైపులా బాగా కాలి పొట్టు ఊడి వస్తూ ఉంటుంది, లోపల కూడా బాగా కాలి,మెత్తగా అయి ఉంటుంది . ఇప్పుడు ఒక గిన్నెలోకి నీళ్లు తీసుకుని ఈ వంకాయని అందులో వేసి పొట్టు వలిచేయాలి. ఇప్పుడు 3–4 పచ్చిమిరపకాయలని నిప్పుల మీద కాల్చాలి, వంకాయని కాల్చినట్టే. తరువాత ఆ వంకాయని చేత్తో మెదిపి లోపల తెల్ల పురుగులు ఉన్నాయేమో గమనించి తీసేయ్యాలి, వంకాయని బాగా మెదిపి, పచ్చిమిరపకాయలని కూడా బాగా మెదిపి, పేస్ట్ లాగా చేసుకుకోవాలి లేదా రోట్లో నూరుకుంటే ఒక నిమిషం లో పేస్ట్ అయిపోతుంది, ఇక, సన్నగా, చిన్నగా ,తరిగిన రెండు ఉల్లిపాయలు, సరిపడా చెంచాడు ఉప్పు,కొత్తిమీర తరుగు వేసి బాగా కిందనించి మీదదాకా కలగలపాలి, నానబెట్టుకున్న చింతపండుని పులుసు తీసి ఈ వంకాయ ఉల్లిపాయ పేస్ట్ లో పోసి గ్లాసుడు నీళ్లుపోయ్యాలి. గరిటతో ఈ మిశ్రమాన్ని బాగా పైనించి కిందకి కలపాలి. ఇష్టం అయితే కొద్దిగా అవలూ, జీలకర్ర ,రెండు ఎండుమిరపకాయలు, పసుపు,కరివేపాకు, కొద్దిగా ఇంగువ వేసి పోపు పెట్టుకుంటే వంకాయ పచ్చిపులుసు రెడీ.

Brinjal Curry with Raw greenpeace….వంకాయ బఠాణీ

కావలసినవి
వంకాయలు: పావుకిలో
పచ్చి బఠాణీలు: 50 గ్రాములు
పచ్చిమిర్చి: నాలుగు
అల్లం: అంగుళం ముక్క
వెల్లుల్లి రెబ్బలు: నాలుగు
దనియాలపొడి: 1 టేబుల్‌స్పూన్లు
కారం: టీస్పూను
ఉప్పు: తగినంత
కొత్తిమీర తురుము: కొద్దిగా
కొబ్బరి తురుము: టేబుల్‌ స్పూను
తాలింపుకోసం: ఆవాలు, జీలకర్ర, మినప్పప్పు, ఎండుమిర్చి, ఇంగువ, కరివేపాకు
పసుపు : అర చెంచా
తయారుచేసే విధానం:
ముందు రోజు రాత్రి ఎండు బఠానీలను నాన బెట్టుకొని వంకాయ కూర చేసే ముందు ఉడికించుకోవాలి. పచ్చివయితే నేరుగావేయవచ్చు అల్లం,వెల్లుల్లి, పచ్చిమిర్చి ముద్దలా చేయాలి… బాణలిలో నూనె వేసి తాలింపు దినుసులన్నీ వేసి వేగాక అల్లం, వెల్లుల్లివేయాలి. తరవాత పచ్చిమిర్చి ముద్ద, బఠాణీలు వేసి రెండు నిమిషాలు వేయించాక కొద్దిగా నీళ్లు చిలకరించి మూతపెట్టి కాసేపు మగ్గనివ్వాలి. తరువాత వంకాయ ముక్కలుగా కోసి ఇందులో వేసి మూతపెట్టిఉడికించాలి. అవసరమైతే కొద్దిగా నీళ్లు కలుపుకోవచ్చు. చివరగా దనియాలపొడి, కారం, ఉప్పు, పసుపు, కొబ్బరితురుము, కొత్తిమీర తురుమువేసి ఉడికించి దించుకోవాలి.