ప్రముఖ వాహన సంస్థ హోండా.. తన సివిక్ డీజిల్ మోడల్ ను బీఎస్6 ఫార్మాట్లో అప్డేట్ చేసి భారత మార్కెట్లో విడుదల చేసింది. ఈ సరికొత్త బీఎస్6 హోండా సివిక్ ప్రారంభ ధర వచ్చేసి రూ.20.72 లక్షలుగా సంస్థ నిర్దేశించింది. రెండు వేరియంట్లలో ఇది లభ్యమవుతుంది. 23.6 కిలోమీటర్ల మైలేజినిస్తుంది.
భారత మార్కెట్లో అత్యుత్తమ విక్రయాలు అందుకుంటున్న వాహన సంస్థల్లో ముందు వరుసలో ఉన్న కంపెనీ హోండా ఇండియా. తాజాగా ఈ వాహన సంస్థ తన సివిక్ డీజిల్ మోడల్ ను బీఎస్6 ప్రమాణాలకు అనుగుణంగా మార్పులు చేసి భారత మార్కెట్లో విడుదల చేసింది. ఎక్స్ షోరూంలో ఈ 2020 హోండా సివిక్ డీజిల్ కారు ప్రారంభ దర వచ్చేసి రూ.20.72 లక్షలుగా సంస్థ నిర్దేశించింది. అత్యాధునిక హంగులు, ప్రత్యేకతలో అందుబాటులోకి వచ్చిన ఈ సెడాన్ ఆకట్టుకుంటోంది.
వేరియంట్ల వారీగా హోండా సివిక్ ధర..
ఈ సరికొత్త హోండా సివిక్ మోడల్ రెండు వేరియంట్లలో ఇది లభ్యమవుతుంది. వీఎక్స్, జెడ్ఎక్స్ అనే రెండు వేరియంట్లలో దీన్ని సొంతం చేసుకోవచ్చు.
వీఎక్స్ వేరియంట్ ధర………… రూ.20.72 లక్షలు.
జెడ్ఎక్స్ వేరియంట్ ధర……………. రూ.22.34 లక్షలు.
ఇంజిన్..
ఈ సరికొత్త హోండా సివిక్ బీఎస్6 డీజిల్ కారు 1.5-లీటర్ డీటీఈసీ టర్బోఛార్జెడ్ ఇంజిన్ ను కలిగి ఉంది. ఇది 4000ఆర్పీఎం వద్ద 118 బీహెచ్ పీ బ్రేక్ హార్స్ పవర్, 2000 ఆర్పీఎం వద్ద 300 ఎన్ఎం టార్క్ ను ఉత్పత్తి చేస్తుంది. అంతేకాకుండా ఇది 6-స్పీడ్ మ్యానువల్ గేర్ బాక్స్ వ్యవస్థతో పనిచేస్తుంది. అంతేకాకుండా ఐ-డీటీఈసీ డీజిల్ ఇంజిన్ ఎర్త్ డ్రీమ్ టెక్నాలజీ సిరీస్ అందుబాటులోకి వచ్చింది. ఫలితంగా ఈ కారు ప్రదర్శన, పనితీరు ఎంతో మెరుగుపడింది. అంతేకాకుండా ఈ బీఎస్6 సివిక్ డీజిల్ వాహనం లీటరుకు గరిష్ఠంగా 23.9 కిలోమీటర్ల వరకు మైలేజి నిస్తుంది.
ఫీచర్లు..
ఈ 2020 హోండా సివిక్ మోడల్లో బీఎస్6 డీజిల్ ఇంజిన్ అప్డేట్ కాకుండా వీఎక్స్, జెడ్ఎక్స్ అనే రెండు వేరియంట్లలో ఇది లభ్యమవుతుంది. కర్టెయిన్ ఎయిర్ బ్యాగులు, స్టాండర్డ్ ఆరు ట్యాలీ ఎయిర్ బ్యాగులు తదితర మార్పులు ఇందులో ఉన్నాయి. ఇవి కాకుండా ఇప్పటికే లాంచ్ అయిన హోండా సివిక్ పెట్రోల్ మోడల్లో ఉన్న ఫీచర్లన్ని ఇందులోనూ కొనసాగించింది హోండా సంస్థ. 1.8-లీటర్ ఐ-వీటీఈసీ సాంకేతికత, సీవీటీ ట్రాన్స్ మిషన్ యూనిట్ కూడా ఉంది. వీటితో పాటు ఎల్ఈడీ హెడ్ ల్యాంపులు, ఎల్ఈడీ టెయిల్ లైట్లు, ఎల్ఈడీ డీఆర్ఎల్స్, అతిపెద్ద టచ్ స్క్రీన్ ఇంఫోటైన్మెంట్ సిస్టం, డ్యూయల్ జోన్ ఆటోమేటిక్ క్లైమెట్ కంట్రోల్, ఎలక్ట్రిక్ సన్ రూఫ్ తదితర ప్రత్యేకతలు ఇందులో ఉన్నాయి. భారత మార్కెట్లో ఈ కారుకు పోటీగా స్కోడా ఆక్టేవియా కారు ఉంది.
