మొక్కలు బాగా పెరగాలంటే కలుపు మొక్కలు తీసేయాలి. ఎందుకంటే కలుపు మొక్కల్ని ఎప్పటికప్పుడు తీసెయ్యకపోతే అసలు మొక్కలు త్వరగా పెరగవు. పైగా ఇవి ఎక్కడైనా పెరుగుతాయి. ఆకుకూరల మడిలో, పూలమొక్కల పక్కన, కుండీల్లో, లాన్లో…కలుపు మొక్క కనపడని, పెరగని ప్రదేశం లేదు. మనం ఇష్టపడి పెంచుకుంటున్న మొక్కల కంటే ఇవి స్పీడ్గా పెరుగుతాయి. దాంతో, మట్టిలోని న్యూట్రియెంట్స్, నీరూ, సూర్యరశ్మి, స్పేస్…అన్నీ అవే లాగేసుకుంటాయి.
ఈ కలుపు మొక్కల లక్షణాలు..
– మామూలు మొక్కలు, కలుపు మొక్కలకీ తేడా చెప్పడం చాలా కష్టం. ఇవి రెండూ చూడడానికి ఒకేలా ఉంటాయి.
– ఇవి ఎలాంటి పరిస్థితుల్లో అయినా బతకగలవు.
– మామూలు మొక్కల కంటే ఇవి త్వరగా పెరుగుతాయి.
– వీటికి సీడ్స్ ఎక్కువగా ఉంటాయి.
– కొన్ని కలుపు మొక్కలకి ముళ్ళూ, చిన్న రెక్కలూ వంటివి ఉంటాయి.
– ఇవి త్వరగా పెరుగుతాయి కాబట్టి ఏ మాత్రం ఆదమరిచినా గార్డెన్ మొత్తం వచ్చేస్తాయి.
కలుపు మొక్కల వల్ల నష్టాలు..
– మామూలు మొక్కలకి కావాల్సినవన్నీ కలుపు మొక్కలు ముందే అందుకుంటాయి.
– మామూలు మొక్కల్ని పెరగనివ్వకుండా ఇవి వాటికి అడ్డంగా పెరుగుతాయి.
– వీటిని తీసి పారెయ్యడం ఖర్చుతో కూడుకున్న వ్యవహారం.
– కలుపు మొక్కలు కొన్ని మొక్కల్ని తింటాయి కూడా.
– ఇవి రకరకాల కీటకాలకి ఆధారమౌతాయి.
– మొక్కలకి సరైన గాలి తగలకుండా అడ్డుకుంటాయి.
– మొక్కలకి నీటి సరఫరా సరిగ్గా సాగకుండా చేస్తాయి.
– వీటిని రెగ్యులర్ గా తీసెయకపోతే గార్డెన్ని ఎంజాయ్ చేయడం కుదరదు.
కలుపు మొక్కల్ని ఎలా తీసెయ్యాలి?
రోజూ తోట అంతా తిరుగుతూ, జాగ్రత్తగా గమనిస్తూ కలుపు మొక్కల్ని చేత్తో తీసి పారేయడం మంచిది. కానీ, ఏ మాత్రం రొటీన్ తప్పినా కలుపు మొక్కలు పెరిగిపోతాయి. మార్కెట్లో దొరికేవి తేవచ్చు. కానీ వాటిల్లో ఉండే కెమికల్స్ వల్ల మనం ఇష్టంగా పెంచుకుంటున్న మొక్కలకి కూడా హాని కలుగుతుంది. భూసారం కూడా తగ్గుతుంది. వాటి బదులు ఇంట్లోనే తయారు చేసుకోగలిగే ద్రావణంతో కలుపు మొక్కల బెడదని తేలిగ్గా వదిలించుకోవచ్చు. ఇక్కడ మూడు పద్ధతులున్నాయి. వీటితో కలుపు మొక్కల్ని తీసేసి మీ గార్డెన్ని చక్కగా పెంచుకోండి.
మొదటి పద్ధతి – ఒక పెద్ద బకెట్ లో ఒక గాలన్ వైట్ వెనిగర్ వేయండి. అందులో రెండు టేబుల్ స్పూన్ల లిక్విడ్ డిష్ సోప్ కలపండి. అలాగే ఒక కప్పు ఎప్సమ్ సాల్ట్ కూడా కలపండి. ఈ మూడింటిని బాగా కలపండి. దీన్ని జాగ్రత్తగా గరాటుతో ఒక స్ప్రే బాటిల్ లోకి తీసుకోండి.
రెండవ పద్ధతి – ఒక పెద్ద బౌల్ లో అర కప్పు రాళ్ళ ఉప్పు వేయండి. ఒక కప్పు గోరువెచ్చని నీరు పోయండి. ఉప్పు కరిగే వరకూ కలపండి. గరాటు ద్వారా స్ప్రే బాటిల్ లోకి తీసుకోండి.
మూడవ పద్ధతి – ఒక స్ప్రే బాటిల్ లో ఒక కప్పు నీరు తీసుకోండి. అందులో ఒకటిన్నర టేబుల్ స్పూన్ల లిక్విడ్ డిష్ సోప్ కలపండి. అందులోనే అర చెక్క నిమ్మ రసం పిండండి. బాటిల్ కి మూత పెట్టేసి బాగా కదిపితే లోపల ఉన్నవన్నీ బాగా కలుస్తాయి.
వీటిని ఎలా వాడాలి?
వీటిని బాగా ఎండ గా ఉన్న రోజుల్లోనే వాడాలి. మబ్బు పట్టి ఉన్నా, వాన వచ్చేట్లున్నా ఇవి వాడకపోవడమే మంచిది. ఇవి చల్లాక కూడా కనీసం రెండు రోజుల పాటూ వాన లేకుండా ఉంటే బాగా పనిచేస్తాయి. ఈ ద్రావణాన్ని కలుపు మొక్కల ఆకుల మీదా, కొమ్మల మీదా మాత్రమే పిచికారీ చేయాలి. మంచి మొక్కల మీద కానీ, మట్టి మీద కానీ ఈ ద్రావణం పడకూడదు. ఇది పిచికారీ చేసిన తరువాత ఒక వారంలో మొత్తం కలుపు మొక్కలన్నీ పోతాయి. ఇంకా ఏవైనా ఒకటీ రెండూ ఉంటే మళ్ళీ ఇంకొకసారి స్ప్రే చేయండి. కలుపు మొక్క ఎండిపోయి వేరు కనబడుతుంటే వేరు మీద కూడా స్ప్రే చేయండి. లేదా, అందులోంచి మళ్ళీ మొక్క వచ్చే అవకాశముంది. మిగిలిన ద్రావణాన్ని ఎండ తగలని చల్లని ప్రదేశం లో ఉంచి మళ్ళీ వాడుకోవచ్చు.
