అమ్మ అంటే ఇష్టం ఉండని వాళ్లు ఉండరు. ప్రతి ఒక్కరికి కూడా కన్న తల్లి అంటే ఎంతో ప్రేమ ఉంటుంది. అమృతం ఎలా ఉంటుందో తెలియదు. కానీ అమ్మ ప్రేమ ముందు అది ఎంతో తక్కువ. నిజంగా బ్రహ్మ సృష్టించిన వాటిలో అమ్మను మించిన అపురూపం ఇంకేమీ లేదు. నిజానికి బ్రహ్మను సృష్టించ లేదు అమ్మే బ్రహ్మని సృష్టించింది. అమ్మ గొప్పతనం వర్ణించలేము. అందుకే అమ్మకి ఒకరోజు అంకితం చేశారు.. అసలు ఈ మదర్స్ డే వెనుక కథ ఏంటి..
అమ్మ ప్రేమను వివరించ లేము. త్యాగానికి చిరునామా అమ్మ. కనిపించే దైవం అమ్మ. అంతులేని ప్రేమానురాగాలకు ఆప్యాయతలకు తల్లి ఎవరికైనా ప్రత్యక్ష దైవం అని చెప్పొచ్చు. నవమాసాలు మోసి కష్ట పడి అమ్మ జన్మనివ్వడం ఒక ఎత్తయితే… రెక్కలు ముక్కలు చేసుకుని సరైన దారిలో పెట్టి ఎంతో కష్ట పడేది అమ్మ. ఇలా మీరు ఈ స్థాయిలో ఉండడానికి కారకురాలైన అమ్మని ఎంత ప్రేమగా చూసుకున్నా తక్కువే అవుతుంది.
ప్రతి ఒక్కరు కూడా కన్న తల్లిని గౌరవించాలి. ప్రతి రోజూ అమ్మని ప్రేమించాలి. అమ్మ చేసిన త్యాగాన్ని గుర్తించాలి. ప్రపంచంలోనే అతి పేద వాడు ధనం లేని వాడు కాదు అమ్మ ప్రేమ లేని వాడే ప్రపంచంలో అతి పేద వాడు. ఇక మదర్స్ డే గురించి చూస్తే… ప్రతి సంవత్సరం మే రెండవ ఆదివారం నాడు ప్రపంచ మాతృ దినోత్సవాన్ని జరుపుకుంటూ వస్తున్నాము. నిజానికి మదర్స్ డే వెనుక ఎంతో పెద్ద చరిత్ర ఉంది. గ్రీస్లో రియా అనే ఒక దేవతను మదర్ ఆఫ్ ద గాడ్స్గా భావించి ప్రతి ఏడాదికి ఒక సారి నివాళులర్పించే వారు.
17వ శతాబ్దంలో అయితే ఇంగ్లాండ్లో తల్లులకు గౌరవంగా మదర్ సండే పేరిట ఉత్సవాలు జరిపే వారు. అదే 1872 లో అయితే జూలియ వర్డ్ హోవే అనే ఒక మహిళ అమెరికాలో తొలిసారిగా ప్రపంచ శాంతి కోసం మదర్స్ డేని జరిపించారు. మదర్స్ ఫ్రెండ్షిప్ డేని జరిపేందుకు అన్న మేరీ జర్విస్ అనే మహిళ ఎంతో కృషి చేశారు. 1905 మే 9న ఆమె చనిపోగా ఆమె కుమార్తె మిస్ జర్విస్ మాతృ దినోత్సవం కోసం ఎంత గానో ప్రచారం చేయడం జరిగింది.
అమెరికాలో అన్ని రాష్ట్రాలలో మాతృ దినోత్సవాన్ని 1911 నాటికి జరపడం మొదలైంది. అధికారికంగా 1914 నుంచి దీనిని జరిపించాలని అమెరికా అధ్యక్షుడు ఉడ్రో విల్సన్ నిర్ణయించారు. ఇలా అప్పటి నుంచి కూడా మే రెండో ఆదివారం నాడు మదర్స్ డే ని జరుపుకోవడం ఆనవాయితీగా వస్తోంది.
అమ్మ ప్రేమను విలువ కట్టలేము. ఎంతో ఆప్యాయతను రోజు చూపిస్తూ ఉంటారు. చిన్న తనం నుండి వారికి ఇష్టమైనటు వంటి అభిరుచులను పక్కన పెట్టి ఎన్నో త్యాగాలు చేస్తూ పెంచుతారు. కానీ ఈ మధ్య కాలం లో తిరిగి అమ్మ తో సమయాన్ని గడపడానికి కూడా పిల్లలు ప్రయత్నించడం లేదు.
ఈ మధ్య కాలంలో చిన్నప్పటి నుండి ప్రేమగా పెంచి పెద్ద చేసిన అమ్మ ఇంటికి బరువు అయ్యిపోయింది. చాలా మంది తల్లులు పెద్ద వాళ్ళు అయిపోవడం వల్ల ఓల్డ్ ఏజ్ హోమ్స్లో పెట్టడం… అమ్మని చూసుకోకపోవడం లాంటివి చేస్తున్నారు. మిమ్మల్ని కంటికి రెప్పలా చూసుకుని ఎంతో కష్టపడి ఎన్నో త్యాగాలు చేసిన అమ్మ మీకు బరువై పోవడం అనేది ఘోరం.
ఎక్కడో కాని కన్నతల్లిని చూసుకోవడం లేదు. ఎప్పుడూ కూడా కని పెంచిన అమ్మని మర్చిపోకూడదు. అమ్మ చేసినంతగా ఎవ్వరూ చేయరు. అమ్మ చూసినంతగా ఎవరూ చూడరు. నిజానికి మీరు అంత గొప్ప కాక పోయినా నా పిల్లవాడు గొప్ప, నా పిల్ల గొప్ప అని ఆమె చెబుతూ ఉంటుంది. మీరు చేసే ప్రతి చిన్న పనితో మురిసి పోతుంది ఆమె. అలానే మీరు ఏదైనా చిన్న విజయం పొందారు అంటే అదేదో ఆమె వరల్డ్ కప్ సాధించినట్టుగా ఫీల్ అవుతుంది.
ఇలా కల్మషం లేకుండా ఏమీ ఎరుగని అమ్మకి అంత పెద్ద శిక్ష వేయడం సరైన పని కాదు. కాబట్టి ప్రతి ఒక్కరూ కంటికి రెప్పలా అమ్మను చూసుకోవాలి. చిన్నప్పుడు అమ్మ మిమ్మల్ని ఎలా చూసుకునేది అలానే పెద్దయ్యాక ఆమెని మళ్ళీ మీరు అలా చూసుకోవాలి. అయితే ఈ సంవత్సరం మదర్స్ డే రోజు మరింత స్పెషల్ గా మార్చుకోవడానికి మీ అమ్మతో సమయం గడిపి చాలా మంచి గిఫ్ట్ను అందించండి.
అయితే ఇక్కడో విషయం చెప్పాలి.. మదర్స్ డే వెనుక ఇంత కథ ఉందని చెప్పాం కానీ, అమ్మ ప్రేమకి ఒక్కరోజు సరిపోతుందా.. ఆమెని ప్రతిరోజు ఆనందంగా ఉంచితే అంతకన్నా మనం ఆమెకిచ్చే పెద్ద గిఫ్ట్ ఏం అవసరం లేదనే చెప్పాలి.
