పెసర దోసె

కావలిసినవి
పచ్చ పెసలు : పావు కిలో బియ్యం : 2 టేబుల్ స్పూన్లు
మెంతులు : 1 టేబుల్ స్పూను
ఉల్లిపాయలు : రెండు
పచ్చిమిర్చి : 4 కాయలు
జీలకర్ర : 1 టేబుల్ స్పూన్
అల్లం : కొద్దిగా
తయారు చేసే పద్ధతి
దోసెలు కావల్సిన ముందురోజు రాత్రి పెసలను రాళ్ళు, మట్టిగడ్డలు లేకుండా శుభ్రం చేసుకొని నానబెట్టుకోవాలి. మెంతులు, బియ్యాన్ని కూడా వీటితో పాటు నానబెట్టుకోవాలి.
ఉదయాన్నే పెసలలోని నీరు వంపి శుభ్రంగా కడిగిన తరువాత మిక్సీలోగానీ, గ్రైండర్ లోగాని మొత్తగా రుబ్బుకోవాలి. గ్రైండ్ చేసేటపుడు తగినంత నీరు పోయాలి. మొత్తగా గ్రైండ్ చేసిన తరువాత ఈ పిండిని ఒక పాత్రలోనికి తీసుకోవాలి.
స్టవ్ వెలిగించి పెనం పెట్టి వేడెక్కిన తరువాత నూనెతో తుడిచి దోసెలు వేసుకోవచ్చు. వేడెక్కిన పెనం మీద కొద్దిగా నీరు చిలకరించి తుడిస్తే దోసెలు పలుచగా వస్తాయి. పెనం మీద పిండి పరచిన తరువాత కొద్దిగా సన్నగా తరిగిన ఉల్లిపాయ ముక్కలు, పచ్చిమిర్చి, జీలకర్ర వేసి కొద్దిగా నూనె వేసి కాల్చుకోవాలి. ఇవన్నీ వేసిన తరువాత దోసెను మధ్యలోకి మడచి రెండు వైపులా కాలిన తరువాత తీయాలి. ఉల్లిపాయలు, జీలకర్ర, మిర్చి వేయకుండా పైన ఉప్మా పెడితే ఉప్మా పెసరట్టవుతుంది.
ఈ దోసెలకు అల్లం చట్నీ, పొదీనా చెట్నీ, సెనగపప్పు చెట్నీ, వెరుశెనగ గుండ్ల చట్నీ లేక వెరుశెనగ గుండ్లు, శెనగపపప్పు రెండూ కలిపిన చట్నీ టమాటో చెట్నీ మంచి కాంబినేషన్. డయాబెటిస్ వారికి మినప అట్లు కంటే పెసరట్లు మంచిది. కానీ చట్నీమాత్రం టమాటో, పొదీనా వాడితే మంచిది.

టమాటో దోసె

కావలిసినవి
బియ్యం : కప్పు
మినపపప్పు : పావుకప్పు
టమాటోలు : పండిన టమాటోలు రెండు మీడియం సైజ్ వి
జీలకర్ర : 1 స్పూను
ఇంగువ : కొద్దిగా (ఇష్టంలేని వారు తీసివేయవచ్చు)
బియ్యం, మినపప్పును ఉదయం నుండి సాయంత్రం దాకా నానబెట్టుకుని గ్రైండ్ చేయించి రాత్రంతా అలాగే ఉంచాలి. ఉదయం ఈ పిండిలో జీలకర్ర, టమాటోలను గ్రైండ్ చేసి ఆ గుజ్జును కలిపి దోసెలలాగా వేసుకోవాలి. ఏదైనా చట్నీతో తినవచ్చు.

ఓట్స్ దోసె

కావలిసినవి
ఓట్స్ : 2 కప్పులు
బియ్యపు పిండి : అరకప్పు
బొంబాయి రవ్వ : అరకప్పు
పెరుగు : 2 స్పూన్లు
ఉప్పు : తగినంత
అల్లం : కొద్దిగా తురుముకోవాలి
పచ్చిమిర్చి : 2 లేక మూడు కాయలు
జీలకర్ర : 1 టేబుల్ స్పూన్
తయారు చేసే పద్ధతి
ముందుగా ఓట్స్ ను సువాసన వచ్చేదాకా మాడకుండా వేయించుకోవాలి వీటిని ఆరనిచ్చి పొడి చేసుకోవాలి
ఒక పాత్రలో ఈ ఓట్స్ పిండిని, బొంబాయి రవ్వను, బియ్యం పిండి, సన్నగా తరిగిన పచ్చిమిర్చి, జీలకర్ర, తురిమిన అల్లం, పెరుగు, కొత్తిమీర, తగినంత ఉప్పు కలపి కొద్ది కొద్దిగా నీళ్ళు పోస్తూ దోసెల పిండి మాదిరిగా కలుపుకోవాలి.
తరువాత ఈ మిశ్రమాన్ని దోశెలులాగా వేసి కొద్దిగా నూనె వేసుకొని రెండువైపులా కాల్చకోవాలి. ఏదైనా చట్నీతో తినవచ్చు

గోధుమ పిండితో దోసె

కావలిసినవి:
గోధుమ పిండి : 1 కప్పు
బియ్యపు పిండి : పావు కప్పు
బొంబాయి రవ్వ : పావు కప్పు
పచ్చిమిర్చి : 4
కొత్తిమీర : కొద్దిగా
ఉప్పు : రుచికి తగినంత
తయారు చేసే పద్దతి :
ముందుగా కొత్తీమీర పచ్చిమిర్చి చక్కగా సన్నగా తరుగుకోవాలి.
ఒక వెడల్పాటి పాత్రలో బియ్యంపిండి, గోధుమపిండి, బొంబాయిరవ్వ, జీలకర్ర, తగినంత ఉప్పు వేసి తరిగిన కొత్తిమీర, పచ్చిమిర్చి కూడా కలిపి తగినంత నీరు కలిపి దోసెల పిండిమాదిరిగా కలుపుకోవాలి.
తరువాత పెనం వేడెక్కిన తరువాత మామూలు దోసెలు లాగా వేసుకొని కొద్దిగా నూనె వేసి రెండుప్రక్కలా కాల్చుకోవాలి. ఏదైనా చట్నీతో తినవచ్చు.

కేరెట్ దోసె

కావలిసినవి
బియ్యం : కప్పు
మినపపప్పు : పావుకప్పు
కేరెట్ : 1 పెద్దది తురుముకోవాలి
జీలకర్ర : 1 స్పూను
ఇంగువ : కొద్దిగా (ఇష్టంలేని వారు తీసివేయవచ్చు)
బియ్యం, మినపప్పును ఉదయం నుండి సాయంత్రం దాకా నానబెట్టుకుని గ్రైండ్ చేయించి రాత్రంతా అలాగే ఉంచాలి. ఉదయం ఈ పిండిలో జీలకర్ర, కేరెట్ తురుము కలిపి దోసెలలాగా వేసుకోవాలి. ఏదైనా చట్నీతో తినవచ్చు.

మినప దోసె

కావలిసినవి
బియ్యం : మూడు కప్పులు
మినపపప్పు : ఒక కప్పు
ఉప్పు : తగినంత
తయారు చేసే విధానం
బియ్యం, మినపప్పును ఉదయం నుండి సాయంత్రం దాకా నానబెట్టుకుని గ్రైండ్ చేయించి రాత్రంతా అలాగే ఉంచాలి. దీనినే పులియబెట్టటం (ఫెర్మంటేషన్) అంటారు. ఉదయానికి దోసెల పిండి తయారవుతుంది. పెనం వేడెక్కిన తరువాత పెనంమీద కొద్దిగా నూనెతో తుడిచి దోసెలు వేసుకోవచ్చు.స్పూనుతో కొద్దిగా నూనె వేసుకోవాలి. దోసె వేసే ముందు పెనం మీద కొద్దిగా నీళ్ళు చిలకరిస్తే దోసెలు పలచగా వస్తాయి. రెండు వైపులా కాలిన తరువాత తీయాలి.
మినప దోసెలకు అల్లం చట్నీ, సెనగపప్పు చెట్నీ, వెరుశెనగ గుండ్ల చట్నీ లేక వెరుశెనగ గుండ్లు, శెనగపపప్పు రెండూ కలిపిన చట్నీ మంచి కాంబినేషన్ . దోసె వేసిన తరువాత ఉల్లిపాయలు వేసి కాలనిస్తే ఉల్లిదోసె. బంగాళాదుంప కూర పెడితే మసాలా దోసె.