ఎంఎస్

ఎంఎస్(ఎలక్ట్రికల్ అండ్ ఎలక్ట్రానిక్స్ ఇంజనీరింగ్)

యూకేలో ఎంఎస్ కోర్సుల్లో ఏ స్పెషలైజేషన్ అయినా.. 16 నెలల నుంచి రెండేళ్ల వ్యవధిలో ఉంటుంది. టాప్ యూనివర్సిటీల్లో మాత్రం రెండేళ్ల వ్యవధిలోనే కోర్సుల బోధన సాగుతుంది. ఎలక్ట్రికల్ అండ్ ఎలక్ట్రానిక్స్ ఇంజనీరింగ్‌కి సంబంధించి దాదాపు నలభైకి పైగా స్పెషలైజేషన్స్ అందుబాటులో ఉన్నాయి. ఎలక్ట్రికల్ ఇంజనీరింగ్ విభాగంలో.. ఎలక్ట్రికల్ పవర్ ఇంజనీరింగ్, సిస్టమ్స్ ఇంజనీరింగ్, ఎలక్ట్రో ఆప్టికల్ ఇంజనీరింగ్, ఎంబెడెడ్ లైటింగ్ సిస్టమ్స్, లైటింగ్ డిజైన్ స్పెషలైజేషన్స్‌కు మంచి పేరుంది. వీటితోపాటు ఇటీవల కాలంలో పవర్ జనరేషన్ అండ్ సప్లయ్, రోబోటిక్ సిస్టమ్స్ వంటి ఆధునిక స్పెషలైజేషన్స్‌ను కూడా యూనివర్సిటీలు అందిస్తున్నాయి. కెరీర్ అవకాశాల కోణంలో ఇప్పుడు యూకేలో ఎలక్ట్రికల్ ఇంజనీరింగ్ పీజీ ఉత్తీర్ణులకు డిమాండ్ నెలకొంది. ఈ విభాగంలో మానవ వనరుల డిమాండ్‌కు సరిపడే రీతిలో నైపుణ్యాలున్న అభ్యర్థులు లభించకపోవడమే ఇందుకు కారణం. ఈ కోర్సు పూర్తిచేసిన వారికి ప్రధానంగా పవర్ జనరేషన్ సంస్థలు,ఎలక్ట్రానిక్ ప్రొడక్ట్ మ్యాన్యుఫ్యాక్చరింగ్ సంస్థల్లో డిజైన్, డెవలప్‌మెంట్, రీసెర్చ్ విభాగాల్లో విస్తృత అవకాశాలు లభిస్తున్నాయి. యూకేలోని యూనివర్సిటీలు అందించే సర్టిఫికెట్లకు అంతర్జాతీయంగా గుర్తింపు ఉన్న కారణంగా ఆస్ట్రేలియా, కెనడా, యూఎస్, జపాన్ వంటి ఇతర దేశాల్లోనూ చక్కటి కెరీర్ అవకాశాలు లభిస్తున్నాయి. వేతనాల పరంగా పీజీ స్థాయిలో ఎలక్ట్రికల్ ఇంజనీరింగ్ ఉత్తీర్ణులకు వారికి లభించిన హోదా ఆధారంగా సగటున 75 వేల యూరోల వార్షిక వేతనం అందుతోంది. డిజైన్, రీసెర్చ్ విభాగాల్లో కొలువులు సొంతం చేసుకున్న వారికి లక్ష యూరోల వరకు వేతనం అందే అవకాశం ఉంది. ఈ కోర్సులో చేరాలంటే.. జీఆర్‌ఈలో మంచి స్కోర్లు తప్పనిసరి. వెర్బల్ అండ్ క్వాంటిటేటివ్ విభాగాల్లో 150కుపైగా పర్సంటైల్ స్కోర్, అనలిటికల్ రైటింగ్‌లో నాలుగు పాయింట్ల వరకు స్కోర్ ఉంటే.. టాప్ యూనివర్సిటీల్లో ప్రవేశం సులభంగా లభిస్తుంది. దీంతోపాటు టోఫెల్, ఐఈఎల్‌టీఎస్, పీటీఈ వంటి లాంగ్వేజ్ టెస్ట్ స్కోర్లు కూడా ఉండాలి.

ఎంఎస్ ఆటోమొబైల్ ఇంజనీరింగ్‌
ఆటోమొబైల్ ఇంజనీరింగ్‌లో ఇంజనీరింగ్ మెకానిక్స్, ఇంజనీరింగ్ డ్రాయింగ్, మెకానిక్స్ ఆఫ్ సాలిడ్స్, మెటలర్జీ, మెటీరియల్ సైన్స్, మెషిన్ డ్రాయింగ్, ఆటోమోటివ్ ఇంజిన్స్, వెహికల్ డైనమిక్స్, ఆటో-ఎయిర్ కండిషనింగ్, ఆపరేషన్స్ రీసెర్చ్, క్యాడ్/కామ్, ఇన్‌స్ట్రుమెంటేషన్ అండ్ కంట్రోల్ సిస్టమ్స్ తదితర సబ్జెక్టులు ఉంటాయి. ఆటోమొబైల్ ఇంజనీర్లు ఆటోమోటివ్ డిజైన్, డెవలప్‌మెంట్, ఇంజిన్స్, ఎయిర్ కండిషనింగ్, అప్లికేషన్, సర్వీస్ వంటి విభాగాల్లో పనిచేస్తారు. ఈ వృత్తిలో రాణించడానికి ఎనలిటికల్ స్కిల్స్, క్యాడ్/క్యామ్ అంశాలపై పట్టు ఉండాలి.

ఈ కోర్సు పూర్తిచేసుకున్న వారికి మారుతి, టాటా మోటార్స్, ఫోర్డ్, ఫియట్, టయోటా, హోండా, మహీంద్రా అండ్ మహీంద్రా వంటి కంపెనీలు టాప్ రిక్రూటర్లుగా నిలుస్తున్నాయి.

ఆటోమొబైల్ ఇంజనీరింగ్‌లో ఎంఎస్ చేయడానికి అత్యధిక మంది విద్యార్థులు ఆసక్తి చూపుతున్న దేశం జర్మనీ. 2011-12లో జర్మనీ విశ్వవిద్యాయాల్లో చదువుతున్న భారతీయుల సంఖ్య 5,998 కాగా, అది 2015-16కు 13,740కు చేరింది. ఈ సంఖ్య ఏటా పెరుగుతోంది. ఈ కోర్సుకు టెక్నికల్ యూనివర్సిటీ ఆఫ్ మ్యూనిచ్, టెక్నికల్ యూనివర్సిటీ ఆఫ్ బెర్లిన్ తదితర విశ్వవిద్యాలయాలు ప్రముఖమైనవి. ఇతర దేశాలతో పోల్చితే జర్మనీలో ఖర్చు చాలా తక్కువ. ఎంఎస్ కోర్సుకు అర్హత సంబంధిత విభాగంలో బ్యాచిలర్ డిగ్రీ. జీఆర్‌ఈ, టోఫెల్, అకడమిక్ ప్రతిభ ఆధారంగా ప్రవేశం కల్పిస్తారు.
పూర్తి వివరాలకు: www.daad.de