ఇంజనీరింగ్‌లో ఏ బ్రాంచ్ మంచిది.. దేనికి ఉద్యోగ అవకాశాలు ఎక్కువ

ఎలక్ట్రానిక్స్ అండ్ కమ్యూనికేషన్..
ఎలక్ట్రానిక్ అండ్ కమ్యూనికేషన్ ఇంజనీరింగ్(ఈసీఈ)లో విద్యుత్ ప్రవాహం, సెమి కండక్టర్లు, కండక్టింగ్ అండ్ నాన్ కండక్టింగ్ మెటీరియల్స్ తదితరాలపై ప్రధానంగా దృష్టిపెడతారు. సమాచారం, ఇంధనం, వ్యవసాయ రంగం సహా ప్రతి విభాగంలో ప్రస్తుతం ఈసీఈ పాత్ర కీలకంగా మారుతోంది. ఉక్కు, పెట్రోలియం, రసాయన పరిశ్రమల్లోనూ, ఆరోగ్య రంగంలోనూ ఎలక్ట్రానిక్ పరికరాల వినియోగం తప్పనిసరి. సురక్షిత రవాణా, ఫ్యాక్టరీలు, గనులు, గృహాల్లో ఎలక్ట్రానిక్ పరికరాల పాత్ర గణనీయం.

• ఎలక్ట్రానిక్స్ అండ్ కమ్యూనికేషన్ ఇంజనీరింగ్‌లో అనలాగ్ ట్రాన్స్‌మిషన్, డిజిటల్ ట్రాన్స్‌మిషన్, రిసెప్షన్ ఆఫ్ వీడియో, వాయిస్ అండ్ డాటా, బేసిక్ ఎలక్ట్రానిక్స్, సాలిడ్ స్టేట్ డివెసైస్, మైక్రో ప్రాసెసర్స్, డిజిటల్ అండ్ అనలాగ్ కమ్యూనికేషన్, అనలాగ్ ఇంటిగ్రేటెడ్ సర్క్యూట్స్, శాటిలైట్ కమ్యూనికేషన్, మైక్రోవేవ్ ఇంజనీరింగ్, ఆంటెన్నా అండ్ వేవ్ ప్రొగ్రెషన్ తదితర అంశాలను అధ్యయనం చేస్తారు. దాంతోపాటు ఎలక్ట్రానిక్ పరికరాలు, సర్క్యూట్స్, ప్రసార ఉపకరణాలైన ట్రాన్స్‌మీటర్, రిసీవర్, ఇంటిగ్రేటెడ్ సర్క్యూట్స్, మైక్రోవేవ్స్, ఫైబర్ వంటి వాటి తయారీలో ఈసీఈ కీలకపాత్ర పోషిస్తుంది.
• నైపుణ్యాలు: ఈసీఈలో రాణించాలనుకునే విద్యార్థికి ఫిజిక్స్, మ్యాథ్స్‌లపై పట్టుతో పాటు ఎలక్ట్రానిక్స్, టెక్నాలజీ పట్ల మక్కువ ఉండాలి. అలాగే శ్రమించేతత్వం, సృజనాత్మకత, నిరంతరం నేర్చుకోవాలనే తపన, టెక్నాలజీ రంగంలో వస్తున్న మార్పుల్ని పసిగట్టి నిత్యనూతనంగా ఉండటం, చక్కటి తార్కిక విశ్లేషణా సామర్థ్యం వంటివి తప్పనిసరి.
• ఉపాధి వేదికలు: ఎలక్ట్రానిక్స్ ఇంజనీర్లకు కేంద్ర, రాష్ట్ర ప్రభుత్వ విభాగాల్లోనూ, వాటి అనుబంధ సంస్థలు, కార్పొరేషన్లలోనూ ఉద్యోగావకాశాలు లభిస్తాయి. ప్రైవేటు రంగంలోనూ ఉపాధి అవకాశాలు పుష్కలం. అలాగే ఎంటర్‌టైన్‌మెంట్, ఎలక్ట్రానిక్స్, కన్‌స్యూమర్ డ్యురబుల్స్, ట్రాన్స్‌మిషన్ ఇండస్ట్రీ, పరిశోధన సంస్థలు, సిగ్నలింగ్ ఎక్విప్‌మెంట్స్, రాడార్ కంట్రోల్ ఎక్విప్‌మెంట్స్ తదితర విభాగాల్లోనూ అవకాశాలు విస్తృతం. టెలికాం సెక్టార్, సాఫ్ట్‌వేర్ అండ్ హార్డ్‌వేర్, నెట్‌వర్కింగ్ రంగాల్లోనూ పనిచేయవచ్చు.

ఎలక్ట్రికల్ ఇంజనీరింగ్…
ఎలక్ట్రిసిటీ, ఎలక్ట్రానిక్స్-వాటి అనువర్తనాల గురించి ఎలక్ట్రికల్ ఇంజనీరింగ్ అధ్యయనం చేస్తుంది. ఇంజనీరింగ్‌లో ఎలక్ట్రికల్‌ను ఆసక్తిదాయక బ్రాంచ్‌గా చెప్పొచ్చు. ప్రస్తుతం ఎలక్ట్రికల్ ఇంజనీరింగ్ పరిధి రోజురోజుకీ విస్తృతమవుతోంది. బీటెక్ స్థాయిలో ఎలక్ట్రికల్, ఎలక్ట్రానిక్స్‌ను కలిపి చదువుతారు. ఇందులో కంప్యూటర్, ఎలక్ట్రానిక్స్ అండ్ కమ్యూనికేషన్, ట్రాన్స్‌మిషన్ అండ్ డిస్ట్రిబ్యూషన్ ఆఫ్ ఎలక్ట్రిసిటీల గురించి అధ్యయనం చేస్తారు. ఎలక్ట్రికల్ ఇంజనీరింగ్ ప్రధానంగా విద్యుత్ పంపిణీ చుట్టూ తిరిగితే.. ఎలక్ట్రానిక్ ఇంజనీరింగ్ ఎలక్ట్రానిక్ సర్క్యూట్‌లు, కంప్యూటర్లు, ఇతర మోడ్రన్ టెక్నాలజీల గురించి పేర్కొంటుంది. మ్యాథమెటిక్స్, ఫిజిక్స్‌ల్లో పట్టున్న అభ్యర్థులు ఎలక్ట్రికల్ ఇంజనీరింగ్ బ్రాంచ్‌ను ఎంచుకుంటే మంచి భవిష్యత్ ఉంటుంది.

• ఉపాధి వేదికలు: పవర్ ప్లాంట్‌లు, రైల్వేలు, విద్యుత్ పంపిణీ బోర్డులు, ఎలక్ట్రికల్ డివెజైస్, ప్రొడక్షన్ కంపెనీలు, మాన్యుఫ్యాక్చరింగ్ కంపెనీలు వంటివి.
• టాప్ రిక్రూటర్స్:
• ఓఎన్‌జీసీ
• పీజీసీఐఎల్
• కోల్ ఇండియా లిమిటెడ్
• బెల్
• సెయిల్
• సీమెన్స్ లిమిటెడ్
• బజాజ్ ఇంటర్నేషనల్ ప్రైవేట్ లిమిటెడ్
• కాంప్టన్ గ్రీవ్స్ లిమిటెడ్
• రిలయన్స్ పవర్ లిమిటెడ్ తదితరాలు.

కెమికల్ ఇంజనీరింగ్…

• ప్రస్తుతం డిమాండ్ ఉన్న బ్రాంచుల్లో కెమికల్ ఇంజనీరింగ్ ఒకటి. ప్రపంచవ్యాప్తంగా కెమికల్ ఇంజనీర్లకు అవకాశాలు లభిస్తున్నాయి. కెమికల్ ఇంజనీరింగ్ గ్రాడ్యుయేట్లకు ఇండస్ట్రియల్ ఇంజనీర్స్, అప్లికేషన్స్ ఇంజనీర్, పేటెంట్, ఫుడ్ ప్రాసెసింగ్, ప్లాస్టిక్, మైనింగ్, మెటీరియల్ సైన్స్, నానోటెక్నాలజీ తదితర విభాగాలు, పరిశ్రమల్లో ఉద్యోగాలు లభిస్తాయి.
• టాప్ రిక్రూటర్స్:
• ఎల్ అండ్ టీ
• హిందుస్థాన్ యూనిలీవర్
• డా.రెడ్డీస్ ల్యాబ్స్
• క్యాడ్బెరీ ఇండియా
• రిలయన్స్ ఇండస్ట్రీస్ తదితర కంపెనీల్లో కొలువులు దక్కించుకోవచ్చు.

కంప్యూటర్ సైన్స్..

• ప్రస్తుతం మన జీవితాల్లో కంప్యూటర్ విడదీయలేని భాగమైంది. అదెంతలా అంటే కంప్యూటర్ లేకుండా ఒక్క క్షణం గడపలేని పరిస్థితి. ఏ రంగంలో చూసినా.. కంప్యూటర్ ఇంజనీర్ల సేవలు తప్పనిసరిగా మారుతున్నాయి. అందుకే కంప్యూటర్ సైన్స్ ఇంజనీరింగ్(సీఎస్‌ఈ) పూర్తి చేసిన అభ్యర్థులకు భవిష్యత్ పరంగా ఎలాంటి ఢోకా ఉండదని నిపుణులు పేర్కొంటున్నారు. నెట్‌వర్క్ నిర్వహణ, సాఫ్ట్‌వేర్ రూపకల్పన, కోడింగ్ వంటి నైపుణ్యాలు కలిగిన అభ్యర్థులకు ఐదంకెల జీతాలతో కార్పొరేట్ రంగం స్వాగతం పలుకుతోంది.
• ఇంటర్ పూర్తయిన వారిలో అధిక శాతం మంది సీఎస్‌ఈలో చేరి ప్రముఖ సాఫ్ట్‌వేర్ సంస్థల్లో స్థిరపడాలని కలలు కంటున్నారు. సాఫ్ట్‌వేర్, హార్డ్‌వేర్ సమాచార వ్యవస్థల రూపకల్పన, అనువర్తనం, నిర్వహణ తదితరాల సమాహారాన్ని కంప్యూటర్ సైన్స్‌గా పేర్కొనొచ్చు. అనలిటికల్ స్కిల్స్, ప్రాబ్లమ్ సాల్వింగ్ నైపుణ్యాలు, క్రియేటివిటీ, క్రిటికల్ థికింగ్ తదితర నైపుణ్యాలున్న అభ్యర్థులకు సీఎస్‌ఈ బ్రాంచ్ చక్కగా సరితూగుతుంది. కంప్యూటర్ ఇంజనీరింగ్‌పై ఆసక్తి ఉన్న విద్యార్థులు మ్యాథ్స్ నైపుణ్యాలను పెంచుకోవడంతోపాటు కోడింగ్, ఆపరేటింగ్ సిస్టమ్స్, డేటాబేస్ మేనేజ్‌మెంట్ వంటి వాటిపై అవగాహన పెంచుకోవడం మేలు.
• జాబ్ ప్రొఫైల్స్: సీఎస్‌ఈ అభ్యర్థులకు కంప్యూటర్ ప్రోగ్రామర్, సిస్టమ్ డిజైనర్, సాఫ్ట్‌వేర్ డెవలపర్, ఇంజనీరింగ్ సపోర్ట్ స్పెషలిస్ట్, ఇ-కామర్స్ స్పెషలిస్ట్, డేటా వేర్‌హౌజ్ అనలిస్ట్, సాఫ్ట్‌వేర్ ఇంజనీర్ తదితర కొలువులు లభిస్తాయి.
• రిక్రూటర్స్:
• టీసీఎస్
• ఇన్ఫోసిస్
• విప్రో
• హెచ్‌సీఎల్
• యాక్సెంచర్
• కాగ్నిజెంట్
• మైక్రోసాఫ్ట్
• ఐబీఎం
• అడోబ్
• గూగుల్
• సిస్కో
• ఒరాకిల్
• సన్ మైక్రోసిస్టమ్స్
• యాహూ
• టెక్‌మహీంద్రా.

మెకానికల్ ఇంజనీరింగ్..
మెకానికల్‌ను ‘మదర్ ఆఫ్ ఆల్ బ్రాంచెస్’ అని పిలుస్తారు. ఇది ఇంజనీరింగ్ బ్రాంచుల్లోకెల్లా అత్యంత ప్రాచీనమైనది. ప్రస్తుతం అవకాశాలు, భవిష్యత్ కెరీర్ పరంగా మెకానికల్ మెరుగైన స్థానంలోనే ఉంది. మెకానికల్ ఇంజనీరింగ్.. డిజైన్, మాన్యుఫ్యాక్చరింగ్, టెస్టింగ్, మెకానికల్ సిస్టమ్స్ డెవలప్‌మెంట్ తదితరాల చుట్టూ తిరుగుతుంది. దీన్ని పూర్తి చేసిన వారికి కన్‌స్ట్రక్షన్, ఆటోమోటివ్, రోబోటిక్స్, ఎనర్జీ సెక్టార్ తదితర రంగాల్లో ఉద్యోగ అవకాశాలు లభిస్తాయి. ఆటోమొబైల్, ఆటోమేషన్, రోబోటిక్స్, తయారీ రంగాల విస్తరణతో నైపుణ్యాలున్న మెకానికల్ ఇంజనీరింగ్ విద్యార్థులకు అవకాశాలకు కొదవలేదని చెప్పొచ్చు.

• ఉపాధి వేదికలు: థర్మల్ పవర్, ఆటోమొబైల్, ఆయిల్, గ్యాస్ ఎక్స్‌ప్లొరేషన్ అండ్ రిఫైనింగ్, గ్యాస్ టర్బైన్, ఎయిర్ కండీషన్ అండ్ రిఫ్రిజిరేషన్, ఏరోస్పేస్, అగ్రికల్చర్, ఆర్మ్‌డ్ ఫోర్సెస్, షిప్పింగ్, ఫార్మాస్యూటికల్ ఇండస్ట్రీలు ప్రధాన ఉపాధి వేదికలు.
• పీఎస్‌యూలు: ప్రభుత్వ రంగ సంస్థలు (పీఎస్‌యూ) మెకానికల్ ఇంజనీర్లకు ఉద్యోగాలు కల్పిస్తున్నాయి. అవి…
• ఇండియన్ బ్యూరో ఆఫ్ మైన్స్
• సీమెన్స్
• ఢిల్లీ మెట్రో రైల్ కార్పొరేషన్
• భారత్ ఎలక్ట్రానిక్స్ లిమిటెడ్
• బీహెచ్‌ఈఎల్
• ఎన్‌టీపీసీఎల్ తదితరం.

మైనింగ్ ఇంజనీరింగ్…

• మైనింగ్ ఇంజనీరింగ్‌లో విద్యార్థులు ప్రధానంగా భూమి నుంచి ఖనిజాలను వెలికితీసే పద్ధతుల గురించి అధ్యయనం చేస్తారు. భారతదేశంలో సహజ వనరులు పుష్కలం. దీంతో దేశీయంగా మైనింగ్ ఇంజనీరింగ్ అవసరం పెరిగింది. ప్రస్తుత దేశ జీడీపీలో మైనింగ్ రంగం గణనీయ వాటా కలిగుండటమే దీనికి నిదర్శనం. కాబట్టి రాబోయే సంవత్సరాల్లో నైపుణ్యవంతులైన మైనింగ్ ఇంజనీర్లకు చక్కటి అవకాశాలు లభిస్తాయనడంలో సందేహం లేదు. సైన్స్, మ్యాథ్స్ నైపుణ్యాలున్న అభ్యర్థులు మైనింగ్ స్పెషలైజేషన్‌ను ఎంచుకోవచ్చు.
• టాప్ రిక్రూటర్స్:
• ఇండియన్ బ్యూరో ఆఫ్ మైన్స్
• జియోగ్రాఫికల్ సర్వే ఆఫ్ ఇండియా
• కోల్ ఇండియా లిమిటెడ్
• నైవేలీ లిగ్నైట్ కార్పొరేషన్
• నాల్కో
• హిందుస్థాన్ కాపర్ లిమిటెడ్
• యురేనియం కార్పొరేషన్ ఆఫ్ ఇండియా
• దామోదర్ వ్యాలీ కార్పొరేషన్
• హిందుస్థాన్ జింక్ లిమిటెడ్.

సివిల్ ఇంజనీరింగ్..

• కోర్ బ్రాంచుల్లో సివిల్ ఇంజనీరింగ్ ప్రముఖమైంది. ఇది రోడ్లు, వంతెనలు, కాలువలు, ఆనకట్టలు, విమానాశ్రయాలు, మురుగునీటి వ్యవస్థలు, పైప్‌లైన్లు, కన్‌స్ట్రక్షన్ విభాగాల్లో డిజైన్, నిర్మాణ కార్యకలాపాల గురించి అధ్యయనం చేస్తుంది. సివిల్ ఇంజనీర్ గ్రాడ్యుయేట్లకు బిల్డింగ్ కంట్రోల్ సర్వేయర్, సీఏడీ టెక్నీషియన్, కన్సల్టింగ్ సివిల్ ఇంజనీర్, డిజైన్ ఇంజనీర్, సైట్ ఇంజనీర్, స్ట్రక్చరల్ ఇంజనీర్ కొలువులు లభిస్తాయి. ప్రైవేట్‌తోపాటు ప్రభుత్వ విభాగాల్లోనూ సివిల్ ఇంజనీర్లకు ఉద్యోగాలు దక్కుతాయి.
• టాప్ రిక్రూటర్స్:
• హిందూస్తాన్ కన్‌స్ట్రక్షన్ కంపెనీ
• పెస్టీజ్ ఎస్టేట్స్
• ఒబెరాయ్ రియాలిటీ
• డీఎల్‌ఎఫ్
• ఎల్ అండ్ టీ
• హీరానందాని కన్‌స్ట్రక్షన్ ప్రైవేట్ లిమిటెడ్
• గోద్రేజ్ ప్రాపర్టీస్ తదితర సంస్థల్లో ఉద్యోగాలు సొంతం చేసుకోవచ్చు.